По повод Светскиот ден на нилскиот коњ (World Hippo Day), денеска, пред живеалиштето на Буцо – нилскиот коњ во Зоолошката градина Скопје и во Едукативниот центар се одржа едукативен настан со учениците од ОУ „Лазо Трповски“ и со други посетители.

На прашањата од учениците за карактеристиките на ова африканско животно и за неговите специфики одговараа Александар Глигоров, едукатор и Билјана Дрнкова, зоонегувател која цели 17 години се грижи за ова егзотично животно.

По едукативниот час, настанот се префрли во Едукативниот центар, каде што се одржа ликовна работилница на која децата направија креативни творби.

Големо изненадување беа инспиративните литературни состави на дел од учениците на тема „Не бев во Африка, а видов нилски коњ“, а децата ги презентираа своите пишани творби за овој веќе загрозен животински вид во светот.

Настанот заврши со убава проекција на егзотичниот Нилски коњ – Глорија и евалуација на настанот, на која децата изразија голем интерес за ваков начин на едукација, со кој се постигнува и зголемен обем на знаења.